Dokumente të reja të depozituara të martën në Qendrën Kombëtare të Biznesit zbulojnë arkitekturë komplekse korporative pas projektit për transformimin e ishullit Sazan në resort luksoz. Projekti u prezantua nga Jared Kushner, dhëndri i presidentit të Shteteve të Bashkuara.
Kompania zbatuese Sazan Operations, e themeluar më 1 prill në Shqipëri, kontrollohet në 100% të aksioneve nga vëllezërit Ramez dhe Mohamad Al-Khayyat, me bazën e bizneseve në Katar. Pronësia ushtrohet përmes rrjeti prej 6 kompanish të huaja, që zotërojnë njëra-tjetrën në formë kaskade.
Njëra prej tyre, Blue Industries Investment Holding B.V., e regjistruar në Holandë, ka pesë aksionerë shqiptarë të panjohur. Këta zotërojnë 24% të aksioneve, çka u mundëson të mos shfaqen në regjistrin e përfituesve fundorë.
Mohamad Al-Khayyat është i përfshirë edhe në projektin e resortit në Zvërnec, përmes degës shqiptare të kompanisë Urbacon Trading and Contracting – Albanian Branch.
Dokumentet e Sazan Operations u shfaqën në QKB në të njëjtën ditë me vendimin e Komitetit të Investimeve Strategjike për shtyrjen e afatit të negociatave për projektin e Sazanit. Për të, kompania Atlantic Incubation Partners LLC, e lidhur me Kushner, ka marrë statusin e investitorit strategjik nga qeveria shqiptare.
Profili i vëllezërve Al-Khayyat
Vëllezërit Al-Khayyat, me origjinë siriane, drejtojnë konglomeratin Power International Holding (PIH), me aktivitete në ndërtim, pasuri të paluajtshme, bujqësi dhe shëndetësi. PIH ishte kontraktor kryesor në infrastrukturën për Kuptën e Botës Katar 2022. Një investigim i The New York Times, i publikuar më 19 prill 2026, vuri në dukje lidhjen mes tyre dhe Kushner.