Qeveria shqiptare ka shtyrë afatet për projektin prej 1.4 miliardë eurosh që parashikon zhvillimin e një resorti luksoz në Ishullin e Sazanit. Vendimi u mor nga Komiteti i Investimeve Strategjike në fund të vitit 2025-ës, duke ndryshuar afatet kyçe të vendimit të vitit 2024-ës që i kishte dhënë statusin e investimit strategjik investitorit amerikan Atlantic Incubation Partners LLC.
Arsyet përfshijnë vështirësitë teknike, ligjore dhe infrastrukturore, si dhe kompleksitetin e projektit e mungesën e koordinimit mes institucioneve dhe investitorit. Plani i veprimit fillestar nuk u zbato në kohë.
Ndryshimet kryesore prekin fazën e negocimit dhe përgatitjes:
- Afati për dorëzimin e dokumentacionit nga investitori zgjatet në 90 ditë nga 60 ditë.
- Periudha për negociimin e marrëveshjes rritet në 120 ditë, me mundësi shtyrjeje për 120 ditë të tjera.
Janë rishikuar detyrat e institucioneve shtetërore. Ministrisë së Ekonomisë i jepet më shumë kohë për konsolidimin e pronësisë dhe kalimin e aseteve te Korporata Shqiptare e Investimeve. Afatet për kushtet e zhvillimit të marinës turistike dhe përfshirjen e plazheve në listën zyrtare janë përshtatur.
Një ndryshim i rëndësishëm është kostoja për pastrimin e zonës nga rreziku piroteknik. Ndryshe nga vendimi fillestar, ku parashikohej të mbulohej nga investitori, tani kjo barrë i kalon Ministrisë së Mbrojtjes.
Dokumenti thekson përparimet:
- Është nënshkruar një memorandum mirëkuptimi mes palëve.
- Janë zhvilluar 10 raunde negociatash.
- Është siguruar ekspertizë për mbrojtjen e interesave shtetërore.
- Ministria e Mbrojtjes ka përfunduar inventarizimin e aseteve, identifikimin e kostove për pastrimin dhe regjistrimin e pronave.
Përditësime
- Projekti parashikon një investim prej rreth 1.4 miliardë euro për ndërtimin e një kompleksi turistik me marinë, hotele, rezidenca dhe shërbime të tjera turistike në sipërfaqe prej rreth 45 hektarë.
- Ishulli i Sazanit ndodhet pranë Vlorës dhe administrohet nga Ministria e Mbrojtjes.