Sipas të dhënave zyrtare të Regjistrit të Pronarit Përfitues, kompania shqiptare Albania Land Development, e cila është angazhuar në zhvillimin e projektit turistik në Sazan dhe Zvërnec, ka në strukturën e saj të pronësisë dy shtetas nga Katari.
Kontrolli mbi subjektin ushtrohet përmes një rrjeti kompanish të regjistruara në Katar, ku përfshihen:
- Assets International LLC
- Assets Real Estate Development WLL
- Assets Real Estate Ventures LLC
- Power International Holding WLL
- Sazan Land Holding LLC
- Sazan Real Estate Development LLC
Grupi Power International Holding (PIH), i cili figuron në strukturën e pronësisë, njihet si një nga entitetet më të mëdha private në Katar, me shtrirje në sektorët e ndërtimit, pasurive të paluajtshme, turizmit, energjisë dhe shërbimeve financiare.
Projekti në fjalë parashikohet të shndërrojë zonën bregdetare në një qendër turistike me resorte, marina, hotele dhe infrastrukturë moderne, duke u cilësuar si një nga investimet më të mëdha të këtij lloji të shpallura ndonjëherë në Shqipëri.