Për shkak të temperaturave të larta dhe kushteve të thata, Komuna e Prishtinës ka njoftuar se malet përreth kryeqytetit janë përfshirë nga zjarre, duke kërkuar nga qytetarët ndërgjegjësim dhe kujdes të shtuar. Institucioni ka paralajmëruar se mjafton një shkëndijë e vetme në këto kushte për të shkaktuar përhapje të shpejtë të zjarrit, i cili rrezikon pyjet, pronat, kafshët dhe jetën e njerëzve.
Në apelin e saj, Komuna u ka kërkuar qytetarëve të respektojnë masat e mëposhtme:
• Të mos ndezin zjarre në natyrë.
• Të mos djegin barishte, hamullishta ose mbeturina.
• Të mos hedhin cigare të ndezura në hapësira të hapura.
• Të mos lënë prush apo materiale të tjera që mund të shërbejnë si burim zjarri.
Në rast se qytetarët vërejnë tym apo zjarr, u kërkohet të largohen menjëherë nga zona e rrezikut dhe të njoftojnë Zjarrfikësit e Kryeqytetit në numrin 193. Gjithashtu, autoritetet komunale kanë shprehur mirënjohje për punën e vazhdueshme të ekipeve të zjarrfikësve dhe punonjësve të Drejtorisë për Siguri dhe Emergjenca, të cilët po përballen me zjarret ditë e natë për mbrojtjen e natyrës dhe sigurinë e qytetarëve.