Për shkak të rrezikut në rritje nga temperaturat e larta, Policia Rajonale e Ferizajt u ka bërë thirrje qytetarëve që të tregojnë përgjegjësi për parandalimin e zjarreve.
Policia ka listuar veprimet që duhen shmangur në mënyrë kategorike:
• Djegia e mbeturinave;
• Djegia e barit të thatë;
• Djegia e sipërfaqeve bujqësore dhe pyjore.
Sipas njoftimit zyrtar, çdo zjarr i shkaktuar pavarësisht nëse është me dashje apo nga pakujdesia, rrezikon jetën e njerëzve, shkakton dëme të mëdha materiale dhe dëmton rëndë mjedisin. Autoritetet kanë theksuar se do të ndërmarrin të gjitha veprimet e nevojshme ligjore ndaj personave përgjegjës.
Në fund të komunikatës, policia ftoi qytetarët për bashkëpunim në raportimin e rasteve të dyshuara, duke theksuar se vetëm së bashku mund të mbrohet jeta, prona dhe mjedisi.