Sot, më 22 gusht 2026, në qytetin e Prishtinës do të realizohet testimi i Sistemit të Alarmit Publik. Njoftimi është bërë zyrtarisht nga Drejtoria për Siguri dhe Emergjenca e Komunës së Prishtinës.
Sipas njoftimit, testimi do të fillojë në orën 12:15. Gjatë kësaj kohe, alarmi do të lëshohet me zë të njëtrajtshëm, përmes dy aktivizimeve me kohëzgjatje prej 30 sekondash secili. Qëllimi kryesor i këtij operacioni është verifikimi i funksionalitetit dhe efektivitetit të pajisjeve të alarmit, të cilat shërbejnë për njoftimin e popullatës në raste emergjente.
Autoritetet komunale kanë siguruar qytetarët se bëhet fjalë për një proces të mirëfilltë teknik dhe u kanë bërë thirrje atyre që të mos shqetësohen nga dëgjimi i sirenave. Gjithashtu, qytetarëve u është kërkuar të mos ndërmarrin asnjë veprim të nxituar apo të panevojshëm, siç do të ishte largimi nga vendet e punës apo institucionet arsimore, pasi situata nuk lidhet me ndonjë gjendje të vërtetë emergjente.