Komunat e Kosovës kanë paguar 126.6 milionë euro për vendime gjyqësore dhe përmbarimore gjatë vitit 2025. Sipas raportit të Institutit GAP, kjo përfaqëson rritje prej 47 për qind krahasuar me vitin 2024.
Këto obligime burojnë nga kontratat kolektive në arsim dhe shëndetësi, vendimi qeveritar i vitit 2008 për pagesë shtesë bazuar në kualifikim, kompensimet për shujta, transport dhe inflacion për shërbyesit civilë, vonesat në pagesa ndaj furnitorëve dhe projektet kapitale të dështuara.
Instituti GAP thekson se këto janë fonde të taksapaguesve që shkojnë për të mbuluar gjoba dhe detyrime ligjore, në vend që të përdoren për investime dhe shërbime publike.
Komunat me rritjen më të madhe të pagesave janë Prishtina, e cila kaloi nga 10.6 milionë euro në 45.7 milionë euro, Leposaviqi nga 168 mijë euro në 707 mijë euro, Mamusha nga 51 mijë euro në 179 mijë euro, Ferizaji nga 3.3 milionë euro në 8.2 milionë euro dhe Prizreni nga 5.6 milionë euro në 12.7 milionë euro.
Ndërkaq, disa komuna arritën të ulin pagesat: Peja me 66 për qind, Fushë Kosova me 41 për qind dhe Dragashi me 55 për qind.