Ministria e Financave e Izraelit vlerëson se konflikti me Iranin i kushton ekonomisë izraelite rreth 9.4 miliardë shekelë, ose afërsisht 3 miliardë dollarë, në javë, nëse kufizimet kombëtare mbeten në fuqi.
Të hënën, pas vlerësimit të situatës, Komanda e Frontit të Brendshëm e Forcave të Mbrojtjes së Izraelit (IDF) vendosi të zgjasë kufizimet deri në mbrëmjen e së shtunës, 7 mars. Masat përfshijnë:
- Ndalimin e të gjitha tubimeve publike;
- Pezullimin e aktiviteteve arsimore;
- Kufizimin e aksesit në vendet e punës, përjashtim bizneseve thelbësore;
- Kufizimin e lëvizjes për në punë dhe punë nga shtëpia për shumicën e punonjësve;
- Mbylljen e shkollave.
Drejtori i Përgjithshëm i Ministrisë së Financave, Ilan Rom, i dërgoi një letër kreut të Komandës së Frontit të Brendshëm të IDF-së, gjeneralit Shai Klapper, duke kërkuar lehtësimin e kufizimeve dhe kalimin drejt një aktiviteti ekonomik të kufizuar. Ai propozon rihapje graduale dhe të pjesshme të ekonomisë duke filluar nga dita e nesërme.
"Nuk ka mosmarrëveshje për nevojën e ruajtjes së një politike mbrojtëse të përshtatur me situatën e sigurisë, por një mbyllje ekonomike në shkallë të gjerë sjell kosto të rënda financiare", thuhet në deklaratën e Rom-it. Ai shton se nevojitet një zgjidhje që balancon kërkesat e sigurisë me nevojat ekonomike, duke kujtuar se ekonomia izraelite ka paguar një çmim të lartë gjatë dy viteve e gjysmë të fundit për shkak të rritjes së shpenzimeve të sigurisë dhe pasojave të konfliktit me Hamasin.