Epidemia e virusit Ebola, e shkaktuar nga lloji Bundibugyo, ka shënuar një përshkallëzim të ndjeshëm në Republikën Demokratike të Kongos. Autoritetet shëndetësore kanë konfirmuar se numri i të infektuarve ka tejkaluar shifrën prej 2 mijë personash, ndërsa bilanci i viktimave ka arritur në 754.
Sipas të dhënave nga organizata Mjekët pa Kufij (MSF), virusi po përhapet me një ritëm të paprecedentë. Në më pak se pesë javë, numri i rasteve të konfirmuara është trefishuar, ndërsa numri i viktimave është rritur më shumë se pesëfish. Organizata Botërore e Shëndetësisë (OBSH) vlerëson se përmasat reale të krizës mund të jenë dy deri në katër herë më të mëdha sesa raportimet zyrtare.
Shpërthimi u shpall më 15 maj në provincën Ituri, e cila mbetet epiqendra e epidemisë me mbi 90% të rasteve të regjistruara. Kjo zonë, e pasur me minerale, përballet njëkohësisht me praninë e grupeve të armatosura, çka vështirëson reagimin mjekësor. Përveç pesë provincave në Kongo, virusi është raportuar edhe në Ugandën fqinje.
Aktualisht nuk ekziston një vaksinë apo trajtim i miratuar për këtë variant të virusit. Megjithatë, OBSH njoftoi fillimin e provave klinike për vlerësimin e efektivitetit të një medikamenti antiviral. Organizatat ndërkombëtare kanë kërkuar forcimin urgjent të masave mjekësore për të frenuar përhapjen, duke theksuar se shpërthimi aktual ka kaluar tashmë gjysmën e rasteve të regjistruara gjatë epidemisë së viteve 2018-2020.