Kongresisti amerikan Ritchie Torres ka reaguar ndaj deklaratës së ministres serbe Snezhana Paunoviq, e cila në një intervistë televizive u shpreh se do ta kishte kryer spastrimin etnik të Kosovës po të ishte në vendin e Sllobodan Millosheviqit në vitin 1998.
Torres e cilësoi këtë qëndrim si një përqafim të hapur të gjenocidit ndaj shqiptarëve, duke mbështetur vendimin e autoriteteve të Kosovës për ta shpallur atë person non grata dhe duke kërkuar dorëheqjen e saj të menjëhershme.
Reagime të shumta kanë ardhur nga faktori ndërkombëtar lidhur me këtë rast:
• Britania e Madhe e ka cilësuar deklaratën si plotësisht të neveritshme.
• Komisionerja e BE-së për Zgjerim, Marta Kos, ka kërkuar largimin e saj nga detyra.
• Eurodeputeti gjerman Michael Gahler ka kërkuar gjithashtu shkarkimin e ministres.
Departamenti Amerikan i Shtetit (DASH) ka theksuar se prioriteti mbetet paqja në Ballkanin Perëndimor dhe normalizimi i marrëdhënieve ndërmjet Kosovës dhe Serbisë. Washingtoni u ka bërë thirrje politikanëve që të kontribuojnë në stabilitetin e rajonit përmes gjuhës së përdorur në komunikimet publike.