Gjatë një paneli diskutimi në Forumin e Dubrovnikut, ministri në detyrë i Punëve të Jashtme, Glauk Konjufca, foli për dialogun ndërmjet Kosovës dhe Serbisë. Ai konfirmoi se kryeministri në detyrë, Albin Kurti, kishte shprehur gatishmërinë për të nënshkruar Marrëveshjen e Ohrit, por procesi nuk u finalizua për shkak të refuzimit nga pala serbe.
Duke iu përgjigjur komenteve të emisarit të Bashkimit Evropian, Peter Sorensen, i cili e cilësoi marrëveshjen si valide dhe detyruese, Konjufca pranoi se dokumenti mori formën e një "marrëveshjeje xhentëlmenësh". Sipas kryediplomatit kosovar, fillimisht marrëveshja nuk ishte konceptuar në këtë formë, por ndërmjetësit u detyruan të adaptoheshin pas rrethanave të krijuara nga mosnënshkrimi.
Konjufca shprehu pakënaqësinë e qeverisë kosovare ndaj kësaj mënyre trajtimi, duke nënvizuar se pala kosovare synonte një marrëveshje ndërkombëtare me detyrime të qarta ligjore. Megjithatë, pas refuzimit për nënshkrim, Bashkimi Evropian vendosi ta publikojë tekstin në faqen zyrtare të Shërbimit të Veprimit të Jashtëm, duke u kërkuar palëve zbatimin e pikave të dakorduara.
Në fjalën e tij, ministri vlerësoi se efektiviteti i një marrëveshjeje varet kryesisht nga vullneti i palëve për zbatim. Ai përmendi si shembull deklaratën mes Bashkimit Evropian dhe Turqisë, e cila, pavarësisht natyrës joformale, ka shërbyer si model funksional për një periudhë kohore.