Glauk Konjufca, zëvendëskryeministri i parë dhe ministri i Punëve të Jashtme dhe Diasporës së Kosovës, mori pjesë në edicionin e 30-të të Forumit 2000 në Pragë. Në panelin “Bridging the Divide – Crafting a Transatlantic Roadmap for Tech & Economic Security”, ai diskutoi rëndësinë e bashkëpunimit transatlantik për paqen, sigurinë dhe stabilitetin në Ballkanin Perëndimor.
Konjufca e cilësoi Kosovën dëshmi konkrete të suksesit të këtij bashkëpunimi. Sipas tij, vendi ka shënuar përparim të vazhdueshëm që nga përfundimi i luftës, duke ndërtuar institucione demokratike dhe duke ruajtur paqen. Ai ia atribuoi këtë përparim qëndrueshmërisë së institucioneve dhe partneritetit me Shtetet e Bashkuara të Amerikës dhe Bashkimin Evropian.
Gjatë diskutimit, Konjufca iu referua sulmeve në Banjskë dhe në kanalin e Ibër-Lepencit. Ai tha se, pavarësisht kërcënimeve dhe përpjekjeve për destabilizim, institucionet e Kosovës kanë dëshmuar vendosmëri dhe kapacitet për t’u përballur me sfidat dhe për të mbrojtur sigurinë e vendit. Ai theksoi gjithashtu rëndësinë e mbështetjes së vazhdueshme nga partnerët transatlantikë për përballimin e sfidave të sigurisë.
Në përfundim, Konjufca tha se përvoja e Kosovës dëshmon rëndësinë e unitetit dhe të ruajtjes së bashkëpunimit transatlantik për sigurinë dhe të ardhmen e Ballkanit Perëndimor.