Një ngjarje e rëndë është regjistruar në qytetin e Korçës, ku një konflikt brenda familjes ka përfunduar me plagosjen e një 18-vjeçari. Sipas informacioneve zyrtare nga Policia, rreth orës 21:55, shtetasi A.S., 18 vjeç, u paraqit për ndihmë mjekësore në spitalin rajonal të Korçës, pasi kishte marrë dëmtime në kokë, dyshohet me mjet prerës.
Hetimet paraprake kanë zbuluar se autori i dyshuar i ngjarjes është 37-vjeçari N.B., njerku i të dëmtuarit. Konflikti ndërmjet tyre mendohet se ka nisur për motive të dobëta. Menjëherë pas ngjarjes, 37-vjeçari u largua nga vendi i konfliktit, por u lokalizua dhe u kap nga shërbimet e Policisë pas një reagimi të menjëhershëm.
I dyshuari është shoqëruar në Komisariat për veprime të mëtejshme procedurale. Grupi hetimor, nën drejtimin e Prokurorisë, vijon punën për zbardhjen e plotë të rrethanave dhe dokumentimin ligjor të rastit.