Një ngjarje e rëndë është shënuar gjatë ditës së 17 korrikut 2026 në qytetin e Korçës. Pas një konflikti në lagjen nr. 8, një 18-vjeçar është plagosur me thikë në zonën e kokës.
I riu është dërguar menjëherë në Urgjencën e Spitalit Rajonal të Korçës, ku po merr ndihmë mjekësore. Sipas informacioneve paraprake, ai ndodhet nën kujdesin e stafit në repartin e reanimacionit.
Forcat e Komisariatit të Policisë Korçë kanë reaguar pas njoftimit për ngjarjen, duke bërë të mundur lokalizimin dhe arrestimin e 37-vjeçarit Niko Baka, i cili dyshohet se është njerku i të dëmtuarit.
Grupi hetimor, nën drejtimin e prokurorisë, vijon punën për dokumentimin e plotë të rrethanave dhe shkaqeve që çuan në përshkallëzimin e dhunshëm të konfliktit.
Përditësime
Policia e Korçës ka zbardhur detajet e plagosjes me thikë të ndodhur mbrëmjen e djeshme, rreth orës 21:55. Viktima, shtetasi A.S., mbeti i plagosur pas një konflikti për motive të dobëta. Autori i dyshuar, Niko Baka, 37 vjeç, u arrestua nga shërbimet e policisë menjëherë pas ngjarjes, pasi ishte larguar nga vendi i krimit për t'iu shmangur kapjes.
Policia e Korçës ka sqaruar rrethanat e plagosjes së 18-vjeçarit, ku si autor dyshohet Niko Baka, 37 vjeç. Konflikti ka ndodhur gjatë një darke familjare në banesën e bashkëjetueses së autorit, ku pas konsumimit të alkoolit, debati mes palëve në prani të familjarëve është përshkallëzuar në përdorimin e thikës. Autoritetet e kanë klasifikuar ngjarjen si konflikt familjar.