Ministri në detyrë i Mbrojtjes së Kosovës, Ejup Maqedonci, dhe ministri i Mbrojtjes Kombëtare të Turqisë, Yaşar Güler, nënshkruan më 5 maj 2026 Marrëveshjen e Bashkëpunimit Financiar Ushtarak ndërmjet qeverive të dy vendeve.
Sipas njoftimit të Ministrisë së Mbrojtjes së Kosovës, kjo marrëveshje parashikon mbështetje financiare prej 200 milionë lira turke nga Qeveria e Turqisë për Qeverinë e Kosovës. Shuma, e barabartë me rreth 4 milionë euro sipas disa burimeve, synon fuqizimin e kapaciteteve të Forcës së Sigurisë së Kosovës (FSK) dhe avancimin e saj institucional e profesional.
Në ceremoninë e nënshkrimit ishin të pranishëm zëvendësministri i Mbrojtjes, Enis Kervan, dhe komandanti i FSK-së, gjenerallejtënant Bashkim Jashari.
Ejup Maqedonci deklaroi se marrëveshja përfaqëson një dëshmi të qartë të partneritetit strategjik midis dy vendeve dhe të gatishmërisë për ta forcuar bashkëpunimin në mënyrë konkrete e afatgjate. Ai theksoi se ky bashkëpunim reflekton nivelin e lartë të marrëdhënieve bilaterale dhe vullnetin e përbashkët për t’i zhvilluar ato në shërbim të paqes dhe stabilitetit rajonal.