Kombëtarja e Kosovës ka shënuar një sukses historik duke siguruar vendin e parë në Grupin 2 të Ligës C në kualifikimet për Kupën e Botës 2027. Fitorja bindëse me rezultatin 8:0 ndaj Gjibraltarit ishte vendimtare për kalimin në fazën play-off dhe promovimin në Ligën B për ciklin e ardhshëm.
Dominimi i "Dardaneve" ishte i qartë që në pjesën e parë, ku u shënuan pesë nga tetë golat e takimit. Golashënueset për Kosovën ishin:
• Donjeta Halilaj (minuta e 3-të)
• Erëleta Memeti (minutat 7 dhe 21)
• Kaltrina Biqkaj (minuta e 14-të)
• Lumbardha Misini (minuta e 32-të)
• Modesta Uka (minuta e 68-të)
• Blerta Smaili (minuta e 76-të)
• Gentiana Fetaj (minuta e 84-t)
Me këtë rezultat, Kosova arriti në kuotën e 15 pikëve, baraz me Kroacinë, por siguroi kreun e grupit falë goldallimit më të mirë, me 20 gola të shënuar dhe vetëm 3 të pësuar.
Kryetari i Federatës së Futbollit të Kosovës, Agim Ademi, uroi futbollistet dhe stafin teknik për këtë arritje. Ai vlerësoi përkushtimin dhe karakterin e treguar nga ekipi gjatë gjithë ciklit kualifikues, duke e cilësuar këtë sukses si një dëshmi të progresit të vazhdueshëm të futbollit të femrave në vend.