Kosova do të mbajë zgjedhje parlamentare të parakohshme më 7 qershor. Kuvendi u shpërnda automatikisht këtë javë, për shkak të dështimit për zgjedhjen e presidentit të ri brenda afatit kushtetues.
Departamenti Amerikan i Shtetit (DASH) po ndjek nga afër zhvillimet dhe shprehet i shqetësuar për bllokadën politike. Një zëdhënës deklaroi për Radion Evropa e Lirë se “bllokimi i vazhdueshëm politik dëmton besimin në institucionet e Kosovës”. Ai shtoi se “do të donim t’i shihnim të gjitha grupet politike të bashkëpunojnë për interesat më të mira të popullit të Kosovës”.
Lëvizja Vetëvendosje, parti në pushtet, akuzon opozitën për bojkotim të qëllimshëm të seancave. Partitë opozitare fajësojnë pushtetin për mungesë bashkëpunimi dhe përpjekje për përqendrim të pushtetit.
Legjislatura e dhjetë, e dalë nga zgjedhjet e parakohshme të 28 dhjetorit, zgjati më pak se tre muaj. Kjo legjislaturë u formua pas krizës politike që nisi me zgjedhjet e rregullta të 9 shkurtit 2025, kur Kuvendi nuk u konstituua për muaj të tërë dhe përpjekjet për formimin e Qeverisë dështuan.
Analistët paralajmërojnë se Kosova rrezikon një skenar si ai i Bullgarisë, e cila në pesë vjetët e fundit ka mbajtur shtatë cikle zgjedhjesh pa arritur stabilitet institucional. Kriza ndikon në vendimmarrjen shtetërore dhe rrit barrën financiare për buxhetin.
Më 2 maj, Komisioni Qendror i Zgjedhjeve (KQZ) nisi afatin për deklarimin e partive politike dhe formimin e koalicioneve, deri më 7 maj. Po ashtu, nisi afati për certifikimin e partive të reja, deri më 10 maj, dhe dorëzimin e listave të kandidatëve për deputetë, më 12 maj. KQZ miratoi planin e aktiviteteve dhe buxhetin për zgjedhjet, në vlerë 10 milionë e 887 mijë euro.