Policia e Kosovës zhvilloi më 22 janar një operacion policor në Prishtinë dhe fshatin Zaplluxhë të Komunës së Dragashit, në kuadër të hetimit ndërkombëtar “Switch Off”. Aksioni, i udhëhequr nga Prokuroria Speciale e Republikës së Kosovës (PSRK), koordinohet nga Europol dhe Prokuroria Distriktuale e Republikës së Katanias në Itali.
Bastisjet u kryen nga hetuesit e Sektorit për Hetimin e Krimeve Ekonomike, me urdhër të PSRK-së, nën dyshimin për veprat penale “Cenim i të drejtave të autorit” dhe “Shpëlarja e parave”. Gjatë kontrollit u sekuestrua një kompjuter dhe katër hard disqe.
Sipas njoftimit të PSRK-së, në mesin e të dyshuarve të këtij grupi kriminal është një shtetas kosovar me inicialet P.B.. Një burim raporton se ai është arrestuar, ndërsa hetimet vazhdojnë për identifikimin e personave të tjerë të implikuar.
Operacioni u zhvillua njëkohësisht në Mbretërinë e Bashkuar, Spanjë, Itali dhe Rumani, duke eliminuar një infrastrukturë informatike IPTV që shërbente në mënyrë të paligjshme për miliona përdorues. Në hetim kanë bashkëpunuar gjithashtu Kanadaja, India, Koreja e Jugut dhe Emiratet e Bashkuara Arabe.
PSRK-ja thekson përkushtimin për luftën kundër krimit financiar dhe ekonomik, duke theksuar bashkëpunimin ndërkombëtar për sundimin e ligjit.
Përditësime
Petrit Bahtijari është emri i plotë i të dyshuarit, të cilin policia e kishte kërkuar në shtëpinë e tij në Lagjen Marigona javën e kaluar, por nuk e kishte kapur.