Kostandin Nishku, i njohur edhe si Baki Duzha, u arrestua në Greqi për llogari të drejtësisë shqiptare. Ai i fshihej autoriteteve që nga viti 1997, pas vrasjes së një djali 10-vjeçar në Gramsh.
Ngjarja ndodhi më 19 mars 1997, kur Nishku bashkë me Roland Kotorri shkuan të armatosur në shtëpinë e Kujtim Bregu në Gramsh. Objektivi ishte Veli Bregu, vëllai i Kujtim Bregu, i cili kishte vrarë vëllain e Nishkut në vitin 1993 dhe ishte arratisur nga burgu gjatë trazirave të vitit 1997.
Veli Bregu nuk gjendej në banesë. Aty ishin Kujtim Bregu, gruaja e tij, djali 10-vjeçar dhe vajza 15-vjeçare. Pas kërkesës për të dhënë të dhëna mbi vendndodhjen e Veli Bregut dhe mungesës së përgjigjes, Nishku urdhëroi Kotorri të vriste djalin e mitur. Pas refuzimit të Kotorrit, Nishku e qëlloi me pistoletë në kokë, duke i shkaktuar vdekjen e menjëhershme.
Pas ngjarjes, Nishku u largua drejt Greqisë, ku jetoi me identitetin e rremë Hariz Vjeri. Identifikimi u bë përmes krahasimit të fotos së tij nga viti 1997 me atë të pasaportës së marrë në mënyrë të paligjshme në vitin 2013.
Nishku është dënuar me burgim të përjetshëm në mungesë. Pas arrestimit në Greqi, pritet ekstradimi në Shqipëri për vuajtjen e dënimit.