KOSTT, Operatori i Sistemit, Transmisionit dhe Tregut të Energjisë Elektrike të Kosovës, ka paralajmëruar se nominimet e pamjaftueshme të KESCO-s po rrezikojnë stabilitetin e sistemit. Kjo situatë ka ndodhur më 20 janar 2025.
Sipas njoftimit, KOSTT po përballet me vështirësi të jashtëzakonshme në balancimin e sistemit në kohë reale për shkak të devijimeve të mëdha mes energjisë së nominuar dhe kërkesës reale. KESCO ka nominuar rreth 26.17% më pak energji sesa kërkesa reale, duke çuar në jo balanca mesatare prej rreth 211 MW orë. Në disa orë, këto jo balanca tejkalojnë 260 MW orë.
KOSTT e ka cilësuar këtë situatë të papranueshme dhe që cenon stabilitetin e sistemit elektroenergjetik. Bën thirrje që nominimet të reflektojnë saktë kërkesën reale dhe të korrigjohen menjëherë për të shmangur devijimet dhe për të ruajtur sigurinë e sistemit.
Si masë e fundit për garantimin e operimit të sigurt, KOSTT detyrohet që nga ora 10:00 të kërkojë aplikimin e kufizimit të ngarkesës deri në përmirësimin e gjendjes.