KOSTT, Operatori i Sistemit, Transmisionit dhe Tregut të energjisë elektrike të Kosovës, ka paralajmëruar reduktime të rrymës në vend për 13 dhe 14 janar 2026. Kjo masë ndërmerret për të garantuar funksionimin e sigurt të sistemit elektroenergjetik dhe për të mbrojtur integritetin e rrjetit.
Sipas njoftimit të KOSTT-it, situata buron nga nominimet e pamjaftueshme të energjisë nga KESCO për mbulimin e nevojave të konsumit. Këto kanë shkaktuar jo-balanca të mëdha dhe të vazhdueshme në Zonën e Kontrollit, që në orë të caktuara tejkalojnë 200 MW.
KOSTT ka ndërmarrë masa për stabilizim, si aktivizimi i shërbimeve ndihmëse të balancimit dhe organizimi i ankandeve brendaditore. Megjithatë, diferenca e madhe ndërmjet nominimeve dhe konsumit real ka bërë që këto veprime të mos jenë të mjaftueshme për eliminimin e plotë të devijimeve.
Ndikimi në rrjetin evropian
Këto jo-balanca ndikojnë negativisht në rrjetin interkonektiv evropian, rrisin rrezikun për stabilitetin e sistemit dhe mund të sjellin pasoja serioze për KOSTT-in, përfshirë masa ndëshkuese dhe rrezikimin e Marrëveshjes së Kyçjes me ENTSO-E.
Në këto rrethina, KOSTT është i detyruar të aplikojë kufizime ngarkese (reduktime) sipas nevojës, në përputhje me përgjegjësitë ligjore dhe operative. Me përmirësimin e situatës dhe stabilizimin e balancimit, do të ndërmarrë menjëherë veprimet për normalizimin e furnizimit.
Përditësime
Kosova u anëtarësua në ENTSO në 2020, duke e ndarë sektorin energjetik nga Serbia dhe duke e bërë KOSTT-në operatorin e transmisionit.
KESCO nominon furnizimin me energji një ditë në avancë, bazuar në parashikimet e konsumit. Parashikimet e gabuara shkaktojnë devijime.
Reduktimet e rrymës nisën në qytete të ndryshme disa orë pas paralajmërimit të KOSTT-it.
- Disa lagje në Prishtinë mbetën pa rrymë për më shumë se një orë.
- Prodhimi i KEK-ut u ul ndjeshëm: blloku A4 jashtë funksionit që në fillim të vitit, B1 më 13 janar 2026.
- KEK-u mbulon vetëm një pjesë të konsumit; rreth 50% nga importi.
Reduktimet e rrymës kanë ndodhur edhe në Fushë-Kosovë.
KOSTT njofton normalizimin dhe stabilizimin e sistemit elektroenergjetik pas rritjes së prodhimit vendor nga KEK.
KEK ka ndërmarrë veprime të shpejta për rritjen e prodhimit, duke garantuar vazhdimësinë e furnizimit.
KOSTT kërkon nga të gjitha palët respektimin e rregulloreve operative dhe obligimeve kontraktuale.
KESCO shpjegon situatën e jashtëzakonshme për shkak të rritjes së ndjeshme të konsumit, duke siguruar rreth 50% të furnizimit nga importi në kushte të vështira tregu.