Kryetari i Grupit Parlamentar të Partisë Socialiste, Taulant Balla, zhvilloi një takim me zëvendëskryetarin e Komitetit për Çështjet e Jashtme në Parlamentin Europian dhe raporterin e PPE-së për Shqipërinë, Andrey Kovatchev.
Në këtë takim, ku Kovatchev ishte i shoqëruar nga një delegacion i deputetëve të Parlamentit të Bullgarisë, u diskutua për ecurinë e procesit të integrimit europian të vendit. Kovatchev rikonfirmoi mbështetjen e Bullgarisë dhe të grupit të Partive Popullore Europiane për aspiratën e Shqipërisë, duke u ndalur te objektivi për mbylljen e negociatave të anëtarësimit brenda vitit 2027.
Balla vlerësoi mbështetjen e vazhdueshme të Bullgarisë dhe të PPE-së, duke theksuar se Shqipëria ndodhet më pranë se kurrë realizimit të synimit për t’u bërë anëtare e Bashkimit Europian.
Diskutimet përfshinë edhe zhvillimet rajonale dhe ato të brendshme të Bullgarisë, përfshirë anëtarësimin e kësaj të fundit në zonën Euro brenda këtij viti. Shqipëria dhe Mali i Zi u vlerësuan si dy vendet më të avancuara të rajonit në procesin e integrimit.
Gjithashtu, u diskutua mbi draft-rezolutën për Shqipërinë, e cila pritet të miratohet të mërkurën në Strasburg. Balla shprehu mirënjohjen për mbështetjen e Parlamentit Europian dhe të PPE-së, e cila reflektohet edhe në këtë dokument.