Kolegji i Posaçëm i Apelimit (KPA) ka lënë në fuqi vendimin e Komisionit të Pavarur të Kualifikimit (KPK) për shkarkimin nga detyra të prokurorit të Elbasanit Neritan Hoxha. Vendimi u shpall më 22 janar 2026 në Tiranë dhe është përfundimtar me efekt të menjëhershëm.
Trupi gjykues i KPA-së përbëhej nga Sokol Çomo kryesues, Natasha Mulaj relatore, si dhe anëtarët Albana Shtylla, Mimoza Tasi dhe Rezarta Schuetz. Shqyrtimi u bë në dhomë këshillimi për çështjen nr. 38/2024, datë 15.10.2024, që i përket apelit të Neritan Hoxha-s kundër vendimit nr. 786, datë 18.07.2024 të KPK-së. Vendimi u mor në mënyrë unanime, bazuar në nenin 66, pika 1, shkronja “a” të ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Neritan Hoxha u shkarkua nga KPK për probleme në kriterin e pasurisë, duke përfshirë deklarime të pasakta e të rreme, deklarim të pamjaftueshëm për pasurinë, dyshime për fshehje të transaksioneve të pasurive, mungesë të burimeve financiare të ligjshme. Në vlerësimin tërësor, bashkë me gjetjet në aspektin profesional, u vlerësua se kishte cënuar besimin e publikut tek drejtësia.
Neritan Hoxha kishte filluar karrierën si prokuror në Prokurorinë e Elbasanit në vitin 2004, ku shërbeu për rreth 20 vjet deri në shkarkim.