Kolegji i Posaçëm i Apelimit (KPA) vendosi të hënën, më 26 janar 2026, në Tiranë, prishjen e vendimit të Komisionit të Pavarur të Kualifikimit (KPK) nr. 805, datë 7 tetor 2024, që kishte shkarkuar prokurorin e Vlorës Xhemal Saliaj.
Trupi gjykues, i kryesuar nga Ina Rama, me relator Sokol Çomo dhe anëtare Mimoza Tasi, Natasha Mulaj e Rezarta Schuetz, e mori vendimin me shumicë votash pas shqyrtimit në dhomë këshillimi të ankimit nr. (JR) 53/2024, datë 20 dhjetor 2024. Vendimi bazohet në nenin 66, pika 1, shkronja b të ligjit nr. 84/2016 "Për rivlerësimin kalimtar të gjyqtarëve dhe prokurorëve".
KPK-ja e kishte shkarkuar Saliaj-in për mosbesueshmëri në vlerësimin e pasurisë dhe cënim të besimit publik në drejtësi. KPA e rrëzoi këtë vendim si të pabazuar.
Xhemal Saliaj e filloi karrierën në vitin 2003 si prokuror në Prokurorinë e Beratit, ku ushtroi edhe funksionin e drejtuesit. Prej vitit 2013 ai shërben në Prokurorinë e Vlorës.