Zgjidhen tre anëtaret e reja të Këshillit të Lartë të Prokurorisë

Në ambientet e Polit të Drejtësisë, Prokurorët e Shqipërisë zhvilluan mbledhjen e përgjithshme ku zgjodhën tre anëtare të reja të Këshillit të Lartë të Prokurorisë (KLP). Antoneta Sevdari u zgjodh përfaqësuese e Prokurorisë së Përgjithshme me 165 vota, Afërdita Ndoi përfaqësuese e prokurorive të apelit me 160 vota, ndërsa Eloida Goxhi përfaqësuese e prokurorive të shkallës së parë me 148 vota. Ato zëvendësojnë anëtarët e mëparshëm Sokol Stojani, Ledina Riza dhe Zeqir Hoda, mandatet e të cilëve kishin përfunduar.

Antoneta Sevdari njihet si magjistratja e parë që u rikthye në sistemin e drejtësisë pas fitores së betejës juridike në Gjykatën Evropiane të të Drejtave të Njeriut. Ndërkaq, Afërdita Ndoi mban edhe detyrën si përfaqësuese e prokurorisë në Këshillin e Emërimeve në Drejtësi (KED) për vitin 2026. Kryetarja e KLP-së, Mirela Bogdani, vlerësoi procesin si një ripërtëritje të rëndësishme për institucionin, duke theksuar përgjegjësinë e lartë që mbart vota e prokurorëve për vendimmarrjet e ardhshme.

Në mbledhje, Prokurori i Përgjithshëm, Olsian Çela, evidentoi sfidat e sistemit, si mbingarkesa me dosje, vakancat në organikë dhe trajtimi financiar i magjistratëve. Ai bëri thirrje për një dialog konstruktiv që respekton standardet e vendosura nga Gjykata Kushtetuese për pagat. Zgjedhja e anëtareve të reja zhvillohet në një fazë delikate për KLP-në, institucioni që po drejton garën për Prokurorin e ri të Përgjithshëm, pasi mandati 7-vjeçar i Olsian Çelës përfundon më 5 dhjetor 2026.

Procedurat për vlerësimin e 5 kandidatëve – Adnan Xholi, Arta Marku, Fatjona Memçaj, Rovena Zoto dhe Ylli Pjetërnikaj – ishin pezulluar për shkak të kërkesave për përjashtimin e anëtarëve të Këshillit, përfshirë një kërkesë të iniciuar nga kandidati Ylli Pjetërnikaj ndaj anëtarit Vatë Staka. Më 8 tetor 2026, KLP rrëzoi këto kërkesa të ndërsjella, duke i hapur rrugë vazhdimit të procesit për zgjedhjen e kreut të ri të institucionit të akuzës.