Procesi për përzgjedhjen e Prokurorit të Përgjithshëm të ri ka ngecur për shkak të kërkesave të njëpasnjëshme për përjashtim mes anëtarëve të Këshillit të Lartë të Prokurorisë (KLP). Që prej datës 28 gusht, këshilli ka dështuar në shtatë mbledhje plenare të vijojë procedurën për shkak të kërkesave të kandidatëve për përjashtimin e anëtarëve të caktuar, si dhe përplasjeve të brendshme mes anëtarëve të këshillit.
Ngërçi filloi kur kandidati Ylli Pjetërnikaj kërkoi përjashtimin e anëtarit Vatë Staka me pretendimin për konflikt interesi. Situata u përshkallëzua me kërkesa të tjera, si ajo e kandidates Arta Marku për përjashtimin e anëtarit Sokol Stojani. Në mbledhjen e datës 2 tetor, këshilli miratoi kërkesën e Vatë Stakës për përjashtimin e kolegut Zeqir Hoda nga shqyrtimi i kërkesave të kandidatëve dhe nga vetë procedura e përzgjedhjes. Mbledhja e radhës, ku pritet trajtimi i kërkesave të mbetura, është caktuar për datën 7 tetor.
Kjo situatë ka shkaktuar tejkalimin e afateve për verifikimin e kandidatëve. Si pasojë, më 18 shtator, këshilli vendosi t’i dërgojë deklaratat e pasurisë së pesë kandidatëve për verifikim pranë Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI).
Shoqata e Prokurorëve ka shprehur shqetësimin e saj, duke theksuar se paanshmëria është kusht thelbësor, por bllokimi i procedurës dëmton besueshmërinë e procesit dhe autoritetin e KLP-së. Ata kërkojnë zgjidhje të shpejta dhe transparente për të garantuar vijimin e garës në përputhje me ligjin. Mandati 7-vjeçar i Prokurorit të Përgjithshëm aktual, Olsian Çela, përfundon në dhjetor, kohë në të cilën kërkohet përzgjedhja e pasardhësit të tij nga Kuvendi me shumicë prej tre të pestave të votave.