Komisioni Qendror i Zgjedhjeve (KQZ) u mblodh për shpalljen e rezultateve përfundimtare të zgjedhjeve të 28 dhjetorit. Mbrëmë përfundoi rinumërimi i votave të kandidatëve për deputetë në Qendrën e Numërimit dhe Rezultateve (QNR).
Anëtari i Partisë Demokratike të Kosovës (PDK) në KQZ, Arianit Elshani, ngriti çështjen e afateve për ankesa lidhur me procesin e rinumërimit. Ai pyeti nëse publikimi i rezultateve përfundimtare është në përputhje me ligjin dhe rregullat e KQZ-së, duke theksuar se kjo mund t'u mohojë të drejtën e ankesës subjekteve politike, kandidatëve dhe qytetarëve për administrimin e procesit të ditës së djeshme, ku afati zgjat deri nesër.
Përgjigjja e kryetarit të KQZ-së
Kryetari i KQZ-së, Kreshnik Radoniqi, sqaroi se nuk ka pasur asnjë ankesë apo vërejtje nga vëzhguesit gjatë rinumërimit, i cili zgjati 18 ditë. Ai shpjegoi se e drejta e ankesës ushtrohet brenda 48 orëve nga shkelja e supozuar dhe se mbeten edhe dy ditë për këtë.
Radoniqi theksoi se zgjatja e procesit do të shtynte shumë procedura të tjera dhe do të pengonte respektimin e afateve. Ai ritheksoi se e drejta e ankesës nuk mohohet, pasi pas shpalljes së rezultateve palët mund të ankohen brenda 48 orëve në Panelin Zgjedhor për Ankesa dhe Palët (PZAP).
Sipas Radoniqit, dispozitat ligjore lidhen me administrimin në Qendrat Komunale të Numërimit (QKN) dhe QNR, ku e drejta për ankesa në ato faza ka kaluar. KQZ vendosi për herë të parë rinumërimin e plotë të procesit në QNR para shpalljes së rezultateve.