Komisioni Qendror i Zgjedhjeve (KQZ) njofton se ka filluar të ofrojë shërbimin për ndërrimin e qendrës së votimit brenda komunës edhe në periudhë jozgjedhore.
Ky shërbim është obligim për KQZ-në sipas Ligjit Nr. 08/L-228 për Zgjedhjet e Përgjithshme. Ai lejon votuesit të ndryshojnë qendrën e votimit vetëm brenda komunës ku janë të regjistruar, në rastet kur e shohin të nevojshme për ta caktuar sa më afër vendbanimit të tyre.
Qytetarët me të drejtë vote mund ta verifikojnë ose ndryshojnë qendrën e tyre përmes dy rrugësh:
- platformës elektronike https://qv.kqz-ks.org;
- kërkesës së paraqitur në Komisionin Komunal të Zgjedhjeve në komunën e regjistrimit.
Pas paraqitjes, kërkesa trajtohet brenda një afati të shkurtër dhe votuesi njoftohet me kohë.
Ndërrimi i qendrës së votimit nga një komunë në tjetër nuk mundësohet drejtpërdrejtë nga KQZ. Kjo kërkon ndryshimin zyrtar të adresës së banimit në Zyrën e Gjendjes Civile ose platformën e-Kosova. Pas konfirmimit nga Shërbimi i Gjendjes Civile, adresa e re reflektohet në Regjistrin Qendror Civil dhe, pas një kohe, në platformën e KQZ-së dhe Listën Votuese.