Kryetari i Komisionit Qendror të Zgjedhjeve (KQZ), Kreshnik Radoniqi, ka konfirmuar se numërimi i fletëvotimeve ka filluar pas mbylljes së qendrave të votimit. Në një konferencë për media, ai deklaroi se rezultatet preliminare do të bëhen publike sonte, duke vlerësuar si orar maksimal kohën rreth orës 22:00.
Sipas të dhënave të përpunuara nga mbi 98% e vendvotimeve, pjesëmarrja e qytetarëve në këto zgjedhje parlamentare ka qenë 36.38%. Gjithsej, nga 1,959,962 qytetarë me të drejtë vote, të drejtën e tyre e kanë ushtruar 712,128 votues. Kjo përqindje shënon rënie krahasuar me procesin zgjedhor të mbajtur më 28 dhjetor 2025, kur pjesëmarrja në të njëjtën kohë kishte arritur në 44.99%.
Kreshnik Radoniqi theksoi se procesi i votimit është zhvilluar në mënyrë të rregullt dhe pa incidente që do të cenonin mbarëvajtjen e tij. Pas përmbylljes së votimit në orën 19:00, ka filluar zyrtarisht afati 48-orësh gjatë të cilit subjektet politike dhe qytetarët kanë të drejtë të paraqesin ankesat e tyre pranë Panelit Zgjedhor për Ankesa dhe Parashtresa (PZAP).
Përditësime
Komisioni Qendror i Zgjedhjeve (KQZ) përditësoi të dhënat mbi pjesëmarrjen, duke konfirmuar se në votime kanë marrë pjesë 712,148 votues, që përfaqëson 36.33% të elektoratit.
Zhvillimet e fundit:
- KQZ njoftoi se konferenca për rezultatet preliminare do të mbahet në orën 21:30.
- Kryetari i KQZ kërkoi nga anëtarët e këshillave të vendvotimeve demonstrim të lartë të profesionalizmit dhe paanshmërisë gjatë procesit të numërimit.