Komisioni Qendror i Zgjedhjeve (KQZ) ende nuk i ka shpallur rezultatet përfundimtare të zgjedhjeve të parakohshme për Kuvendin e Kosovës. Zëdhënësi i KQZ-së, Valmir Elezi, njoftoi se publikimi i këtyre rezultateve varet nga përmbyllja e procedurave ankimore në institucionet përgjegjëse.
Sipas Elezit, pas marrjes së vendimeve nga organet e shqyrtimit, KQZ-ja do të vlerësojë nëse vendimet përmbajnë obligime konkrete që ndikojnë në procedimin e mëtejshëm të rezultateve. Afati ligjor prej 48 orësh për parashtrimin e ankesave ka përfunduar të dielën në mesditë.
Aktualisht, Paneli Zgjedhor për Ankesa dhe Parashtresa po shqyrton dy ankesat e depozituara nga Partia Demokratike e Kosovës, të cilat lidhen me procesin e rinumërimit të votave. Njëra ankesë është dorëzuar të premten, ndërsa tjetra të shtunën. Ky panel ka në dispozicion një afat prej 3 ditësh për të shqyrtuar dhe vendosur lidhur me këto kërkesa, duke përcaktuar kështu hapat e mëtjeshëm për përmbylljen e procesit zgjedhor.