Komisioni Qendror i Zgjedhjeve (KQZ) ka njoftuar se do të mbështetet tek Qeveria e Mbretërisë së Bashkuar për mirëmbajtjen dhe sigurinë e platformës online të rezultateve zgjedhore. Kjo platformë do të shërbejë për publikimin e rezultateve preliminare në kohë reale pas mbylljes së procesit të votimit këtë të diel.
Sistemi, i cili u zhvillua vitin e kaluar me ndihmën e partnerëve britanikë, u përball me probleme teknike në zgjedhjet e shkurtit 2025, kur faqja zyrtare dhe serverët shfaqën paqëndrueshmëri. Sipas Ambasadës britanike në Prishtinë, mbështetja për këtë proces zgjedhor realizohet përmes një projekti të financuar nga Qeveria britanike. Softueri është ndërtuar nga organizata BAE Systems Digital Intelligence, në bashkëpunim me një kompani lokale të Teknologjisë Informative.
Ambasada ka konfirmuar se BAE Systems Digital Intelligence ka kryer testime të infrastrukturës së teknologjisë së informacionit dhe do të ofrojë monitorim të avancuar gjatë gjithë periudhës zgjedhore për të parandaluar sulmet kibernetike. Zëdhënësi i KQZ-së, Valmir Elezi, ka theksuar se platforma e rezultateve është pronë e institucionit zgjedhor.
Nga ana tjetër, ekspertët e sigurisë kibernetike kanë bërë thirrje për investime të mëtejshme. Kastriot Fetahaj, inxhinier i sigurisë kibernetike, nënvizoi se sistemi duhet të jetë në gjendje të përballojë fluksin e lartë të vizitave në momentin e publikimit të rezultateve dhe të garantojë mbrojtje efektive ndaj kërcënimeve digjitale.