Memli Krasniqi, ish-kryetari i Partisë Demokratike të Kosovës (PDK), ka bërë thirrje për pjesëmarrje masive në marshin e planifikuar më 17 shkurt në Prishtinë, në mbështetje të ish-krerëve të Ushtrisë Çlirimtare të Kosovës (UÇK) që gjyqësohen në Hagë.
Përmes një postimi në Facebook, Krasniqi shkruan se marshi vjen në një moment vendimtar, në fazën finale të procesit gjyqësor. "Marshi i kaluar në Prishtinë dëshmoi fuqinë e përbashkimit, kur rreth 100 mijë qytetarë u bashkuan në thirrjen për drejtësi. Të martën, më 17 shkurt, në një moment vendimtar për vendin dhe në fazën finale të procesit në Hagë, do të dalim edhe më shumë", thuhet në postimin e tij.
Ai thekson se çështja nuk lidhet me individë, parti apo grupe të caktuara, por me dinjitetin kombëtar e shtetëror, së vërtetën historike dhe të drejtën për një gjykim të drejtë e të paanshëm. Thirrja përmbyllet me sloganin: "Drejtësi, jo politikë! Liri për çlirimtarët!".
Marshi pritet të nisë në orën 14:00 nga sheshi "Skënderbeu" në Prishtinë, në prag të deklaratave përfundimtare në gjyqin e Hagës, ku ish-krerët e UÇK-së ndodhen që pesë vjet.