Kompania Rajonale e Mbeturinave “Pastrimi” Sh.A. ka intervenuar ditëve të fundit në lagjen Dardania të Prishtinës, ku mbeturina të shumta u hodhën jashtë kontejnerëve, pavarësisht se këto ishin të zbrazëta.
Ekipet e kompanisë kanë larguar menjëherë mbeturinat e hedhura. Nga KRM “Pastrimi” njoftojnë se kjo nuk lidhet me mungesën e shërbimit, por me hedhjen e pakontrolluar dhe të papërgjegjshme të tyre nga qytetarët.
Llojet e mbeturinave të papërshtatshme
• Mbeturina voluminoze;
• Materiale inerte;
• Pajisje të vjetra shtëpiake.
Kompania thekson se kontejnerët shërbejnë vetëm për mbeturina shtëpiake. Ajo u bën thirrje banorëve të tregojnë kujdes dhe përgjegjësi ndaj hapësirës së përbashkët, pasi pastërtia e qytetit është detyrim i përbashkët.
“Ne pastrojmë, por pa bashkëpunimin tuaj, kjo betejë bëhet shumë më e vështirë. Faleminderit të gjithë atyre qytetarëve që respektojnë rregullat dhe kontribuojnë çdo ditë për një qytet më të pastër”, thuhet në njoftimin e kompanisë.