Në radën e portit të Vlorës mbërriti sot kroçera Monet, duke shënuar kroçerën e parë të sezonit turistik veror. Kapiteneria e Portit njoftoi se anija, me flamur të Kingstown, erdhi nga Durrësi në orën 07:45 me 48 turistë në bord.
Turistët vijnë nga vende si Kroacia, Portugalia, Gjermania dhe Anglia. Ata do të vizitojnë pika turistike në zonë, midis tyre Zvërneci dhe Parku Arkeologjik i Apolonisë.
Kroçera do të qëndrojë në Vlorë deri në orën 20:00, për t’u nisur më pas drejt Sarandës. Muaji prill shënon nisjen e sezonit të kroçerave, me numrin e tyre që rritet çdo vit në portin e Vlorës.
Fluksi i kroçerave lidhet me plazhet e detit Jon dhe trashëgiminë kulturore të Shqipërisë. Kroçerat priten të vazhdojnë gjatë gjithë sezonit turistik.