KRU Prishtina ka bërë thirrje për ndërgjegjësim më të madh në përdorimin e ujit me rastin e 22 marsit, Ditës Botërore të Ujit. Kjo ditë thekson rëndësinë e ujit si burim jetik për jetën, shëndetin dhe zhvillimin e shoqërisë.
Enti apelon që uji të ruhet me kujdes dhe të përdoret me përgjegjësi nga të gjithë qytetarët, duke nxitur kursimin në përditshmëri dhe edukimin e komunitetit mbi mbrojtjen e këtij burimi.
Dita Botërore e Ujit shënohet çdo vit më 22 marsin për të rritur ndërgjegjësimin mbi menaxhimin e qëndrueshëm të burimeve ujore dhe sigurimin e ujit të pijshëm. Këtë vit, motoja është “Uji dhe Barazia Gjinore”, duke vënë theksin në qasjen e barabartë në ujë.
Sipas të dhënave ndërkombëtare, situata globale është shqetësuese:
- Rreth 2.2 miliardë njerëz nuk kanë qasje në ujë të pijshëm të sigurt.
- Rreth 3.5 miliardë njerëz nuk kanë sanitacion të sigurt.
- 1 në 4 familje nuk ka ujë brenda shtëpisë.
- Gratë dhe vajzat kalojnë rreth 250 milionë orë çdo ditë duke siguruar ujë për familjet e tyre.
Në Kosovë, sipas Institutit Kombëtar të Shëndetësisë Publike, mbi 99% e mostrave të ujit të testuara janë brenda standardeve të sigurisë. Megjithatë, sfidat mbeten në zonat rurale dhe vendbanimet pa furnizim të centralizuar.