Kompania Rajonale e Ujësjellësit “Prishtina” (KRU Prishtina) ka reaguar në lidhje me shembjen e dheut në rrugën “Don Shtjefën Kurti” në Prishtinë, ku është raportuar dëmtim i infrastrukturës së ujësjellësit.
Sipas vlerësimeve fillestare në terren dhe pamjeve të publikuara, kompania thekson se ngjarja nuk lidhet me rrjetin e ujësjellësit. Shkaku kryesor janë aktivitetet e gërmimeve dhe ndërhyrjeve në terren, të cilat kanë destabilizuar shtresat e dheut dhe kanë krijuar kushte për rrëshqitje. Si pasojë e kësaj rrëshqitjeje, infrastruktura e ujësjellësit në zonë ka pësuar dëmtime.
KRU Prishtina po e monitoron situatën me vëmendje të shtuar. Ekipet profesionale dhe inxhinierët e specializuar do të kryejnë një analizë të detajuar, që përfshin vlerësimin e gjendjes së tokës, ndikimin e punimeve të kryera dhe verifikimin e çdo efekti në rrjetin e ujësjellësit.
Deri në publikimin e raportit përfundimtar teknik, kompania rekomandon të mos nxirren përfundime të parakohshme dhe të mos atribuohet përgjegjësi rrjetit të ujësjellësit pa fakte të verifikuara. Ajo zotohet për transparencë dhe do të njoftojë publikun me të dhëna të sakta.
Kompania bën thirrje që operatorët të respektojnë standardet teknike dhe procedurat e sigurisë gjatë punimeve në terren, për të parandaluar raste të ngjashme. Si pasojë e ngjarjes, një pjesë e kryeqytetit ka mbetur pa energji elektrike.