Qeveria britanike ka njoftuar se do të ndërmarrë hapa të shpejta për të reduktuar koston e jetesës, duke hequr TVSH-në mbi faturat e energjisë elektrike për familjet. Ky ndryshim pritet të hyjë në fuqi më 1 tetor.
Sipas njoftimit zyrtar nga Downing Street, fondet për mbulimin e kësaj mase për vitin aktual financiar do të sigurohen nga shfuqizimi i programit qeveritar për identifikimin dixhital. Ky program, i cili kishte një buxhet prej 1.8 miliardë funtesh, ishte hartuar fillimisht me synimin për t’u pajisur të gjithë punonjësit me një dokument identifikimi elektronik, për të ndihmuar në luftën kundër migracionit të paligjshëm.
Megjithatë, skema e identifikimit dixhital është përballur me kritika të shumta, duke u cilësuar nga një komision parlamentar ndërpartiak si një “fiasko”.
Kryeministri Andy Burnham deklaroi se këto veprime janë të domosdoshme për të rikthyer besimin te qeverisja dhe për të ndihmuar familjet që përballen me vështirësi ekonomike. Ai theksoi se vendimet e marra reflektojnë përkushtimin për t’u shërbyer qytetarëve, pas një periudhe të gjatë stanjacioni ekonomik në vend. “Westminster nuk ka punuar për njerëzit për një kohë shumë të gjatë dhe familjet po përballen me koston e jetesës. Kjo duhet të ndryshojë”, deklaroi Burnham.