Albin Kurti, kryeministër i Republikës së Kosovës, mirëpriti në takim Genc Nimanbegu, kryetar i Komunës së Ulqinit në Mali i Zi, së bashku me delegacionin që e shoqëronte. Vizita u zhvillua një ditë pas shënimit të përvjetorit të Pavarësisë së Kosovës, me ç’rast Nimanbegu e uroi Kurtin për festën.
Gjatë takimit, Kurti theksoi se festa e Ditës së Pavarësisë së Kosovës është festë e të gjithë shqiptarëve, pasi në rrugëtimin drejt lirisë dhe pavarësisë kanë kontribuar shqiptarë nga Kosova, Shqipëria, Maqedonia e Veriut, Mali i Zi, Lugina e Preshevës dhe mërgata.
Të dy palët diskutuan për tema me interes të përbashkët, duke përfshirë zhvillimet politike dhe ekonomike në rajon, si dhe mundësitë e bashkëpunimit të mëtejmë në dobi të qytetarëve.
Kurti e falënderoi Nimanbegun për vizitën dhe urimet, duke shprehur gatishmërinë e plotë për thellimin e bashkëpunimit të ndërsjellë në dobi të zhvillimit dhe mirëqenies së shqiptarëve në Mali i Zi.
Nimanbegu i dhuroi Kurtit një maket punë dore të një anijeje ulqinake me vela, të punuar nga mjeshtri Xhevat Kashoxha.