Kryeministri i Republikës së Kosovës, Albin Kurti, priti më 24 mars 2026 në takim Christophe Kamp, Komisionerin e Lartë të OSBE-së për Minoritetet.
Gjatë takimit, Kurti e falënderoi Kamp për vizitën, letrën dhe rekomandimet e tij. Ai theksoi se Qeveria e Kosovës pajtohet plotësisht me konstatimin se përgjegjësia bie mbi serbët lokalë për të shfrytëzuar të drejtat e garantuara. Korniza ligjore e Kosovës është ndërtuar mbi një model fuqizues, që mundëson pjesëmarrjen aktive të komuniteteve, por kërkon angazhim dhe pronësi lokale.
Palët diskutuan zhvillimet pozitive lidhur me zbatimin e Ligjit për të Huajt, si dhe hapat e radhës për integrimin e plotë të shëndetësisë dhe arsimit në pjesën veriore të Republikës, brenda kornizës ligjore të Kosovës.
Në fushën e të drejtave gjuhësore dhe të komuniteteve, Kurti informoi për hapat konkretë të Qeverisë, përfshirë:
- hapjen e pozitave të drejtorit të Departamentit për Çështje të Komuniteteve në Zyrën e Kryeministrit;
- hapjen e pozitës së Komisionerit për Gjuhët;
- angazhimin për rritjen e kapaciteteve për harmonizim gjuhësor.
Në përfundim, Kurti nënvizoi se faza e ardhshme nuk ka të bëjë me zgjerimin e të drejtave, por me thellimin e përdorimit të tyre përmes ndërtimit të besimit, angazhimit të komuniteteve dhe qasjes së plotë në institucione.