Kryeministri Edi Rama zhvilloi një vizitë dyditore në Izrael në 26 janar, ku u prit me duartrokitje në Knesset, parlamentin izraelit.
Në fjalën e tij hapëse, Rama deklaroi: "Ende nuk jam plotësisht i sigurt që ndodhem vërtetë duke qëndruar pikërisht mbi dyshemenë nën këmbët e mia, dyshemeja prej ku mysafirët më të nderuar të këtij Shteti i janë drejtuar kësaj Dhome. Dhe ndonëse modestia nuk ka qenë kurrë virtyti im më i palëkundshëm, më duhet ta them që e kam të vështirë të besoj se e meritoj një vlerësim kaq të jashtëzakonshëm."
Gjatë vizitës, Rama u ul në krah të kryeministrit izraelit Benjamin Netanyahu, kundër të cilit Gjykata Penale Ndërkombëtare ka lëshuar urdhër arresti në nëntor për krime kundër njerëzimit lidhur me mijëra viktima civile në luftën në Rripin e Gazës gjatë vitit të kaluar.
Reagimet në Shqipëri
Vizita u prit me rezerva në Tiranë. Të premten, një protestë qytetarësh me sloganin "Jo në emrin tim" u shpërnda nga policia para Kryeministrisë.
Opozita e përcolli kryesisht me heshtje, me përjashtim të kryetarit të Lëvizja Bashkë, Arlind Qori. Ai e cilësoi vizitën si tregues të mungesë dinjiteti për Shqipërinë, e cila ka ratifikuar Traktatin e Romës dhe njeh juridiksionin e Gjykatës Penale Ndërkombëtare. Qori shkroi në rrjetet sociale: "Një shtet nuk ka vetëm interesa, ka edhe dinjitet dhe reputacion në marrëdhëniet ndërkombëtare dhe kur humb dinjitetin dhe reputacionin, nuk e ke për gjë pastaj të shkelësh edhe interesat kombëtare, siç kjo qeveri ka bërë vitet e fundit."
Konteksti brendshëm
Sipas ekspertëve, agjenda ndërkombëtare e Ramës synon të fitojë kapital politik brendshëm në mes të një krize legjitimiteti. Drejtësia ka marrë të pandehur zv. kryeministren Belinda Balluku dhe ka ngritur akuza për krijim grupi të strukturuar kriminal në krye të AKSHI-it.
Ekspertët e marrëdhënieve ndërkombëtare e shohin këtë si përpjekje për personalizimin e diplomacisë, në kurriz të asaj institucionale. "Vizita shtetërore në Izrael pikërisht në këtë kohë vjen si përforcim i tezës së diplomacisë personale në kurriz të asaj institucionale dhe të mirëplanifikuar", thotë Ilir Kal.