Kryetari i Komunës së Fushë Kosovës, Valon Prebreza, ka njoftuar zyrtarisht lirimin nga detyra të Drejtorit të Pronës, Gëzim Zogiani. Ky vendim vjen pas arrestimit të Zogianit gjatë një aksioni të ndërmarrë nga organet e rendit në ditët e fundit. Përmes një reagimi publik, Prebreza ka bërë të ditur se shkarkimi është ndërmarrë në kuadër të zotimit për një qeverisje të përgjegjshme dhe transparente.
Në deklaratën e tij, kryetari i komunës ka theksuar se shkarkimi nuk paraqet paragjykim të përgjegjësisë penale të ish-drejtorit. Sipas Prebrezës, përcaktimi i fajësisë mbetet kompetencë ekskluzive e organeve të drejtësisë, institucioneve të cilat ai i ka garantuar për bashkëpunim të plotë.
"Komuna e Fushë Kosovës do të vazhdojë të bashkëpunojë pa rezervë me Prokurorinë dhe me çdo institucion tjetër përgjegjës për zbardhjen e plotë të kësaj çështjeje", është shprehur Prebreza. Ai ka shtuar se në këtë institucion nuk do të ketë mbrojtje politike për asnjë individ, pozitë apo interes të veçantë, duke theksuar se ligji dhe besimi i qytetarëve qëndrojnë mbi çdo vendim tjetër. Kreu i komunës ka përfunduar duke thënë se llogaridhënia duhet të demonstrohet me veprime konkrete dhe se fjala e dhënë qytetarëve do të mbahet.