Komiteti Shqiptar i Helsinkit (KShH) ka përfunduar monitorimin e procedurave të ndjekura gjatë protestës së banorëve të fshatit Zvërnec, të zhvilluar më 30 maj 2026. Sipas raportit, organizatorët kishin njoftuar paraprakisht Policinë e Shtetit, ndërsa Drejtoria Vendore e Policisë Vlorë kishte hartuar një plan masash për ruajtjen e rendit.
Sipas KShH, protesta nisi në mënyrë paqësore, por situata u përshkallëzua kur një banor u tërhoq me forcë brenda rrethimit të kantierit nga persona civilë. Verifikimet treguan se këta individë, megjithëse pretenduan se ishin punonjës të kompanisë Major Security, nuk ishin pjesë e strukturave të sigurisë të kontraktuara nga investitori, përkatësisht kompanisë Myrto. Kjo e fundit, si përgjegjëse për sigurinë e kantierit, duhet të kishte ndaluar hyrjen e këtyre personave të paautorizuar.
Raporti vë në dukje se gjatë incidentit u përdor spray piper dhe gurë nga këta civilë, veprime që prekën si protestuesit ashtu edhe efektivët e policisë të pranishëm në vendngjarje. KShH ngre shqetësimin mbi praninë dhe autoritetin e këtyre individëve, si dhe mbi vonesat në veprimet policore. Pronari i kompanisë Major Security, Gerald Biba, është identifikuar si një ndër personat e përfshirë në aktet e dhunës.
Komiteti i ka bërë thirrje organeve ligjzbatuese, përfshirë Prokurorinë, që të hetojnë rrethanat e ngjarjes dhe përgjegjësitë institucionale për mosndërhyrjen e menjëhershme të forcave të rendit përballë akteve të dhunës.