Pas incidenteve të ndodhura gjatë protestës së zhvilluar para Kuvendit të Republikës së Shqipërisë, Komiteti Shqiptar i Helsinkit (KShH) reagoi përmes një deklarate publike, duke ngritur shqetësim për mënyrën e ndërhyrjes së forcave të rendit. Sipas KShH, pamjet e publikuara në media dëshmojnë përdorimin e forcës fizike dhe tërheqjen zvarrë të disa protestuesve, veprime këto që ngrenë shqetësime në raport me standardet e të drejtave të njeriut.
Në lidhje me ngjarjen, policia shoqëroi në komisariat 6 protestues, ku ndër emrat e konfirmuar figuron edhe Dritan Goxhaj. KShH rikujtoi se e drejta për tubim paqësor është e garantuar nga neni 47 i Kushtetutës së Shqipërisë dhe neni 11 i Konventës Evropiane për të Drejtat e Njeriut (KEDNJ). Organizata theksoi se çdo kufizim i kësaj të drejte duhet të jetë i parashikuar me ligj, i domosdoshëm dhe proporcional.
Duke iu referuar jurisprudencës së Gjykatës Evropiane për të Drejtat e Njeriut (GjEDNJ), KShH nënvizoi se autoritetet shtetërore duhet të shfaqin tolerancë ndaj tubimeve dhe se përdorimi i forcës duhet të mbetet masa e fundit. Organizata vuri në dukje ngjashmëritë e këtyre pamjeve me incidentet e ndodhura një muaj më parë në Zvërnec.
Përveç qëndrimit ndaj forcave të rendit, KShH i bëri thirrje organizatorëve dhe pjesëmarrësve të protestës që të ushtrojnë të drejtën e tyre në mënyrë paqësore, duke shmangur veprimet që mund të çojnë në përshkallëzimin e situatës.