Ministrja e Arsimit, Mirela Kumbaro, deklaroi më 30 tetor, gjatë mbledhjes së Këshillit Kombëtar për të Drejtat dhe Mbrojtjen e Fëmijëve, se shkollat në të gjithë vendin, përfshirë ato në Tiranë dhe Kamzë, janë kthyer në normalitet pas problematikave të evidentuara gjatë dy javëve të fundit. Ajo theksoi se siguria dhe mirëqenia e fëmijëve janë përgjegjësi e përbashkët e institucioneve dhe familjeve.
Kumbaro foli për presionet ndaj nxënësve dhe adoleshentëve, manipulimin në internet dhe thirrjet për bojkot të mësimit. Sipas saj, gjatë dy javëve të fundit janë evidentuar raste kur nxënësit që vijonin mësimin u përballën me thirrje të shpërndara në internet dhe presione nga grupe jashtë shkollave për të bojkotuar mësimin e për të marrë pjesë në tubime gjatë orarit shkollor. Ajo tha se disa thirrje ishin edhe të dhunshme dhe se prindërit nuk kishin dijeni për to, pasi i kishin dërguar fëmijët në shkollë.
Ministrja tha se zhvillimet kërkojnë reflektim mbi mënyrën se si fëmijët përballen me konfliktet, ndikimin e grupit dhe kërcënimet, si dhe mbi aftësinë e tyre për të vlerësuar pasojat e veprimeve. Ajo theksoi se çdo fëmijë duhet të ketë një mjedis ku ndihet i sigurt, i dëgjuar, i pranuar dhe i mbështetur.
Sipas Kumbaros, Ministria e Arsimit ka vijuar koordinimin institucional me Ministrinë e Drejtësisë, Ministrinë e Punëve të Brendshme dhe Agjencinë për të Drejtat dhe Mbrojtjen e Fëmijëve. Strukturat arsimore janë angazhuar për të informuar drejtuesit e shkollave, për të mbështetur shërbimin psikosocial dhe për të forcuar komunikimin me familjet. Kumbaro tha se bashkëpunimi ndërinstitucional dhe me prindërit do të vijojë, me synimin për të nxjerrë mësime nga situatat e fundit dhe për të garantuar një mjedis të sigurt për nxënësit.
Ajo konfirmoi se shkollat janë kthyer në normalitet, veçanërisht shkollat e mesme në Tiranë dhe në bashkinë e Kamzës, ku ishin evidentuar problematika, si edhe në pjesën tjetër të Shqipërisë.