Albin Kurti, kryeministër në detyrë i Kosovës, në takimin e parë të Këshillit Ministror për Integrim Evropian më 14 maj 2026, diskutoi zbatimin e Agjendës së Reformave në kuadër të Planit të BE-së për Rritje Ekonomike në Ballkanin Perëndimor.
Ai akuzoi opozitën parlamentare se pengon punën institucionale dhe ritmin e reformave duke mos ardhur në Kuvend ose duke bllokuar ligjet.
Sipas Kurtit, mungesa e një opozite funksionale ka ndikuar drejtpërdrejt në zbatimin e afateve. “Numri më i madh i reformave do të raportoheshin të kryera deri në fund të qershorit, në qoftë se krahas vullnetit të madh e të mirë e punës serioze të qeverisë sonë, do të kishim edhe një opozitë parlamentare serioze”, tha ai.
Kryeministri specifikoi se 10 reforma skadojnë më 30 qershor, nga të cilat 9 janë tashmë të rrezikuara, duke shkaktuar humbje miliona eurosh. Këto lidhen me 12 projektligje, për hartimin e të cilave ministritë përkatëse kanë bërë punë të jashtëzakonshme duke i përafruar me ligjet dhe standardet e Bashkimit Evropian.
Kurti theksoi se bllokadat sjellin pasoja financiare dhe ngadalësojnë integrimin evropian. Opozita, sipas tij, ka kërkuar zgjedhje me çdo kusht, çka ka çuar në mosfunksionim të Kuvendit. Qytetarët do ta zhbllokojnë situatën pas zgjedhjeve.