Kryeministri i Republikës së Kosovës, Albin Kurti, gjatë qëndrimit në New York, ka nderuar kujtimin e tre vëllezërve Bytyqi, të cilët ishin pjesëtarë të batalionit Atlantiku. Në ceremoninë përkujtimore morën pjesë anëtarë të familjes Bytyqi, kryebashkiakja e Fairview City, Violetta Berisha, përfaqësues të Ligës Qytetare Shqiptaro-Amerikane dhe anëtarë të komunitetit shqiptaro-amerikan.
Kryeministri Kurti i përshkroi vëllezërit Ylli, Agron dhe Mehmet Bytyqi si dëshmorë të kombit, luftëtarë të lirisë dhe shtetas amerikanë me prejardhje shqiptare. Ai theksoi se pavarësisht kalimit të 27 viteve nga vrasja e tyre, drejtësia ende mungon. Sipas kryeministrit, institucionet e Kosovës, në bashkëpunim me shtetin amerikan, mbeten të përkushtuara në gjetjen e përgjegjësve për këtë krim të kryer nga forcat shtetërore serbe.
Gjatë takimit, Ilir Bytyqi, vëllai i viktimave, ndau detaje mbi burgosjen, torturat dhe vrasjen e vëllezërve të tij, duke theksuar se trupat e tyre ishin shpërfytyruar me plumba dhe hedhur në varre masive për të fshehur gjurmët e krimit. Kurti e vlerësoi sakrificën e tyre si dëshmi e përkushtimit të mërgatës shqiptare në SHBA për lirinë e Kosovës, duke nënvizuar se kalimi i kohës nuk e zbeh detyrimin për përgjegjësi penale.
Në fjalën e tij, Kurti theksoi rolin e brezave në ndërtimin e shtetit dhe forcimin e institucioneve, duke e konsideruar rastin e vëllezërve Bytyqi një thirrje për angazhim të vazhdueshëm për sigurinë dhe sovranitetin e vendit. Ilir Bytyqi falënderoi kryeministrin për vizitën, duke e cilësuar praninë e tij si një vlerësim të rëndësishëm për sakrificën e familjes.