Albin Kurti, kryeministër në detyrë i Kosovës, ka përkujtuar 17 janarin 1468, ditën kur Gjergj Kastrioti – Skënderbeu vdiq në Lezhë, i rrethuar nga bashkëluftëtarët dhe lavdia e fitoreve të tij.
Sipas Kurtit, Skënderbeu është personaliteti më i rëndësishëm dhe më i njohur në tërë historinë e shqiptarëve. Ai udhëhoqi për një çerek shekulli rezistencën kundërosmane dhe përpjekjet për ndërtimin e aleancave politike me fisnikët arbër dhe faktorë të tjerë në rajon.
Pinjoll i dinastisë fisnike të Kastriotëve, djali i Gjonit dhe Vojsavës, Skënderbeu u ngrit nga një sinjor mes shumë të tillëve në një strateg ushtarak dhe prijës politik ndër më të njohurit në Evropë. Nga viti 1443, kur u rebelua kundër ushtrisë osmane deri në vdekjen më 1468, ai i priu një qëndrese të gjerë kundër depërtimit osman në Evropë.
Ai bashkoi fisnikët në Kuvendin e Lezhës më 1444, krijoi aleancë me Mbretërinë e Napolit dhe Aragonës, si dhe ruajti marrëdhënie diplomatike me Papatin në Romë, Republikën e Raguzës dhe Republikën e Venedikut.
Kurti ka vlerësuar fitoret e Skënderbeut kundër osmanëve, serbëve në Ballkan dhe kundërshtarëve të Napolit, që i dhanë atij famën e një prej ushtarakëve më gjenialë dhe prijësve më të paepur në Evropë. Figura e tij vazhdoi të frymëzojë brezat, veçanërisht arbëreshët në Itali dhe shqiptarët pas pushtimit osman.
Rilindasit e shekullit XIX e vendosën Skënderbeun si shtyllë të kombformimit dhe shtetndërtimit shqiptar. Kurti thekson se vepra e tij mbetet aktuale dhe ai vazhdon të jetë në qendër të identitetit kombëtar shqiptar, si figurë përbashkuese për të gjithë shqiptarët.