Kryeministri i Kosovës, Albin Kurti, ka emëruar Agron Bajramin në pozitën e kryenegociatorit të Republikës së Kosovës në dialogun teknik për normalizimin e marrëdhënieve me Serbinë. Ky vendim u bë i ditur më 22 prill 2026 përmes një njoftimi zyrtar nga Zyra e Kryeministrit dhe Qeveria e Kosovës.
Kurti e uroi Bajramin për detyrën e re dhe i dëshiroi suksese në përmbushjen e përgjegjësive. Bajrami do të udhëheqë procesin teknik të dialogut, krahas funksionit të tij aktual si ambasador i Kosovës në Mbretërinë e Belgjikës, me seli në Bruksel, ku Bashkimi Evropian ndërmjetëson dialogun Kosovë-Serbi.
Në muajin shkurt, pas votimit të Qeverisë së re, ministri i Punëve të Jashtme dhe Diasporës, Glauk Konjufca, deklaroi se procesi i dialogut do të udhëhiqet nga ministria e tij. Gjatë mandatit të kaluar qeverisës, në nivel politik Kosova u përfaqësua nga Albin Kurti, ndërsa në nivel kryenegociatorësh nga Besnik Bislimi.
Viteve të fundit, Kosova dhe Serbia kanë zhvilluar rundë takimesh në nivel kryenegociatorësh, por takime në nivel të lartë politik nuk ka pasur që nga shtatori i 2023. Atëherë u mbajt rundi i fundit para sulmit të armatosur në Banjskë të Zveçanit, ku një grup serbësh të armatosur vrau një polic të Kosovës. Kosova e akuzon Serbinë për këtë ngjarje, ndërsa Beogradi e mohon përfshirjen. Përgjatë dialogut janë arritur disa marrëveshje, por jo të gjitha janë zbatuar në terren.