Albin Kurti, kryeministër i Kosovës, ka falënderuar deputetët e Kuvendit të Kosovës për miratimin në shqyrtim të parë të projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme.
Ai ka kërkuar miratimin e këtij projektligji edhe në shqyrtimin e dytë, duke e cilësuar si hap të domosdoshëm për jetësimin e byrosë dhe luftën kundër pasurisë së fituar në mënyrë të paligjshme. Deklarata u bë në mbledhjen e qeverisë, pas seancës plenare të Kuvendit.
"Të dashur qytetarë, miratimi në shqyrtim të parë [...] padyshim që përbën një lajm shumë të mirë për vendin tonë dhe drejtësinë. Për këtë, falënderojmë të gjithë deputetët të cilët në seancën plenare votuan për", tha Kurti.
Ai theksoi se emri i ligjit ka trazuar shumëkënd dhe ka hasur kundërshtime të mëdha, madje ankesa në Gjykatën Kushtetuese. "Ne nuk mund dhe nuk do të ndalemi. Do ta jetësojmë këtë zotim. Byroja do të jetësohet, sepse me të përfundimisht do të marrë fund ajo parullë që kurrë nuk do të duhej të na përsëritej në të ardhmen: ‘rroga e vogël, fitimi i madh’", u shpreh ai.
Sipas Kurtit, pasuria e fituar në mënyrë të paligjshme nuk është as private dhe as legjitime. "Sepse ajo kurrë nuk është fituar", shtoi kryeministri.
Përditësime
81 deputetë miratuan në parim projektligjin për Byronë e Pasurisë së Pajustifikueshme të Premtën e kaluar.
Deputetët e PDK-së, LDK-së dhe AAK-së shprehën vërejtje për përmbajtjen.