Albin Kurti, kryeministri i Kosovës, gjatë paraqitjes së programit qeverisës për mandatin e ri, premtoi nisjen e ndërtimit të linjës hekurudhore Gjakovë-Shkodër. Kjo linjë është pjesë e projektit më të gjerë Prishtinë-Durrës për lidhjen e Shqipërisë me Kosovën.
Kurti deklaroi: "Në mandatin e ri do të fillojmë me ndërtimin e linjës hekurudhore Gjakovë-Shkodër në kuadër të asaj Prishtinë-Durrës, dhe do të projektojmë linjën hekurudhore që lidh Prizrenin, Ferizajin, Gjilanin dhe Bujanocin".
Planet kosovare përputhen me ato shqiptare. Hekurudha Shqiptare ka bërë me dije se, duke marrë parasysh ritmet e përgatitjes së dokumentacionit teknik, ndërtimi real mund të nisë brenda 2-3 viteve të ardhshme, pas përfundimit të projektit paraprak dhe prokurimit ndërkombëtar.
Detajet teknike të projektit
- Gjatësi: 105.8 kilometra
- Stacione: 7
- Ura: 43
- Tunele: 14, me gjatësi totale 35.3 kilometra
Kostoja e përllogaritur sipas studimit të fizibilitetit është 1.8 miliardë euro, ku 1.7 miliardë euro lidhen me ndërtimin dhe pjesa tjetër me lejet, shpronësimet dhe elementë të tjerë.
Financimi dhe afatet
Po punohet për modelin e financimit të kombinuar, me mbështetje nga donatorë të ndryshëm dhe kontribute nga Shqipëria dhe Kosova. Hekurudha Shqiptare e vlerëson këtë model të suksesshëm në projekte të tjera hekurudhore.
Projekti pritet të zgjasë rreth 12 vjet nga fillimi i projektimit deri në operim të plotë. Ai do të ndikojë në transportin e mallrave dhe lëvizjen e pasagjerëve.